Gibutyag ni Department of Justice (DOJ) Secretary Jesus Crispin Remulla nga adunay tulo ka mga flood control projects nga gidokumento sa National Bureau of Investigation (NBI) nga adunay anomalya.
Matud ni Remulla nga kabahin kini sa report nga gihatag kaniya sa NBI, human ang nasangpit nga buhatan gipalihok sa paghimo og kaugalingong imbestigasyon sa flood control crisis.
Bisan pa nga wala gidetalye sa kalihim ang kinatibuk-ang sukod sa imbestigasyon sa mga dokumentado nga anomaliya sa nahisgutang mga proyekto, iyang gipasabot nga adunay panagkunsabo ang pipila ka mga opisyal sa maong mga proyekto.
Gipasalig usab sa kalihim nga bisan og dako ang posibilidad nga adunay mga opisyal gikan sa legislative ug executive branch nga posibleng malambigit sa mga anomalosong proyekto, ang DOJ mopagawas sa kinatibuk-ang imbestigasyon, hangtod sa pagpasaka og kaso batok sa mga responsable.
Ingon man, kung kahinumduman ang unang pamahayag ni NBI Director Jaime Santiago, iya nang gimanduan ang matag regional director sa nasangpit nga buhatan sa paghimo og kaugalingong imbestigasyon sa mga flood control infrastructure nga gidudahang natabunan sa mga anomalya.
Gisugdan na sa NBI ang imbestigasyon sa mga imprastraktura sa pagpugong sa baha nga kanhi gibisita ni Pang. Ferdinand Marcos Jr.
