CENTRAL VISAYAS-Tungod sa nagka-modernong panahon karon, mas gitutokan sa mga ahensya sa gobyerno ang kahimtang sa mga mamumuo diri sa Central Visayas partikular na sa medisina ug sa ilang panglawas.
Gibutyag kini atol na natapos nga 3rd Occupational Medicine Week sa nakalabayg semana nga gipangulohan sa Department of Labor and Employment – Central Visayas (DOLE-7) inubanan sa Occupational Safety and Health Center (OSHC) ug Philippine College of Occupational Medicine (PCOM).
Nagtumong kini sa pagpalawm sa diskusyon kabahin sa kahimtang sa pag-empleyo sa mga trabahante sa mga nagkadaiyang establisyemento.
Sa eksklusibong pakighinabi sa Bombo Radyo Cebu kang Roberto “Bob” Cabardo, ang Labor Relation Officer sa DOLE-7 diin gitataw niini nga ang nahitabong press briefing nga nahitabo diri karon sa Sugbo kay tungod pud sa naamot nga bahin sa ekonomiya sa lalawigan og sa rehiyon sa nasod.
Samtang sa pikas bahin, ang president sa PCOM nga si Dr. Anna Sofia Victoria Fajardo kay mipaambit nga naggamit na sila karon og bag-ong mga teknolohiya aron sa mas efficient ug accurate nga pagsuta sa kahimtang sa panglawas sa usa ka trabahante ilabi na sa kontekstong physical labor-intensive ang trabaho.
Gihisgutan usab niini nga sila sa PCOM nagsunod sa mga protocols nga gitakda sa World Health Organization ug International Labour Organization.
Samtang mipadayag sab si OSHC Executive Director Engr. Jose Batino nga gawas sa libreng pagbansay sa occupational safety kay nagdalit pud sila og performance testing sa mga Personal Protective Equipments (PPE) nga ginagamit sa mga trabahante aron mahibaw-an kugn dekalidad pa ang mga kahimanan nga nagprotektar nila sa mga risgo sa trabaho.
Nagtumong ang maong mga ahensya nga mga proactive ug preventative ang mga lakang nga ipatuman sa mga employers ngadto sa ilang mga employees sa padayong pagpatuman sa luwas nga pagpangtrabaho karong panahona.
