CEBU CITY-Aprobado na sa Sangguniang Panlungsod sa kagamhanang dakbayan sa Sugbo ang Php 64.9 milyones pesos nga additional budget nga gi-charge sa PAGCOR funds sa City Hall aron renovation sa Cebu City Sports Center (CCSC) nga nakasinati og kadaot sa milabay nga tuig tungod sa sunog nga nahitabo sa likod sa grand stand.
Ang inisyal nga pundo kay 79 milyones pesos apan sa pag-review ni Cebu City Acting Mayor Raymond Alvin Garcia kay gilaslasan kini tungod sa redundancy sa procured items.
Pamahayag pa ni Konsehal Noel Wenceslao, kinsa Chairman sa Committee on Budget & Finance, nga mao nalang kini ang ulahing budget proposal sa umaabot nga Palarong Pambansa nga panguluhan sa dakbayan sa umaabot nga Hulyo.
Apan dili gihapon iwagtang sa maong konsehal ang posibilidad kung ang ehekutibo manginahanglan gihapon ug dugang pundo sa umaabot kung adunay may lain pang pangbuhat para sa magmalampusong hosting sa torneyo.
Apan, bisan man sa pagdali dali, nagbinantayon gihapon ang oposisyon sa konseho ilabi na si Konsehal Nestor Archival sa additional budget para sa Palarong Pambansa kay sa kinatibuk-an matud niya dako na kaayu og nabubu nga pundo ang City Government alang sa duha ka semana nga torneyo.
