MANDAUE CITY, CEBU- Mibisita si Education Secretary Sonny Angara sa Don Gerardo LL Ouano Memorial National High School, aron susihon ug personal nga masuta ang kahimtang sa mga classroom ug pasilidad sa tunghaan, karong adlawa Lunes, Agosto 18, 2025.
Gipahigayon niya ang makuting inspeksyon sa mga pasilidad ug nakighimamat sa mga opisyal ug magtutudlo aron masabtan ang mga panginahanglan sa eskwelahan.
Kauban niya sa pagbisita si Dr. Salustiano Jimenez, Regional Director sa Department of Education Central Visayas, Mandaue City Mayor Jonkie Ouano, ug Congresswoman Lolypop Ouano.
Ang pagbisita nagpasiugda sa pasalig sa Departamento sa Edukasyon sa pagpauswag sa kalidad sa edukasyon ug mga palibot sa pagkat-on sa tibuok rehiyon.
Gikatakda usab nga makigtagbo si Secretary Angara ug ang iyang delegasyon sa mga lokal nga opisyal sa Mandaue City sa umaabot nga mga adlaw aron hisgutan ang mga proyekto sama sa pagtukod og bag-ong school building ug uban pang mga inisyatibo alang sa pagpalambo sa edukasyon.
Gipasiugda nila ang kahinungdanon sa kooperasyon tali sa Departamento sa Edukasyon ug local government units aron mapalig-on ang academic excellence ug holistic development sa mga estudyante sa Central Visayas.
