CEBU CITY — Padayong gipangita sa kapulisan ang motibo sa kamatayon sa usa ka kanhi barangay ug ang katabang niini human gipusil sa mga armadong kalalakin-an sa Brgy. Jagoliao, sa Getafe, Bohol.
Giila ang mga biktima nga si Alejandro Abaño, 63 anyos, kanhi kapitan sa barangay; samtang ang kauban niini nga si Johnrey “Kirat” Boc, 37 anyos.
Matud ni Police Corporal Roel Botero sa Getafe Municipal Police Station nga misulod ang dili moubos sa 20 ka mga kalalakin-an sa balay ni Abaño bitbit ang ilang long firearms.
Giguba sa mga wala mailhing lalaki ang main door sa balay ug ilang gipaarakan ang mga biktima nga silang Abaño ug Boc.
Misibat dayon ang mga armadong kalalakin-an human sa maong krimen sakay sa ilang pumpboat.
Dugang pa ni Botero nga gi-target sa mga armadong lalaki ang kanhi-kapitan ug ang katabang niini nga natulog sulod sa panimalay.
Kasamtangang giimbestigaran sa kapulisan ang maong krimen.
