CENTRAL VISAYAS- Gipakusog ug mas gipa-lig-on sa Fertilizer and Pesticide Authority (FPA) sa Central Visayas ang ilang paningkamot alang sa mas estrikto nga regulasyon sa mga fertilizers ug pesticides nga ginama ug gibaligya sa Central Visayas.
Ang maong laraw gibuhat aron masiguro nga ang tanang produkto sa merkado rehistrado ug ang tanang handler legal nga lisensyado aron malikayan ang makadaot nga epekto sa kinaiyahan, agri-crop, ug mga mag-uuma.
Naobserbahan sa FPA ang nagkadaghang presensya sa mga local manufacturers, dealers, importers, ug tig-apod-apod sa mga organic ug inorganic fertilizers ug pesticides sa rehiyon.
Sa nahimong pamahayag ni Sunday B. Flores, FPA Cebu provincial officer, nanawagan sa mga fertilizer ug pesticide handler nga tumanon ang proseso sa registration ug licensing sa ahensya, ilabi na sa legal nga pagkuha og Certificate of Product Registration.
Ang FPA usa ka regulatory government agency ubos sa Department of Agriculture (DA) nga gimandoan sa pag-regulate sa maong industriya, ug usab ang nagdumala sa rehistrasyon sa mga produkto sa fertilizers ug pesticides ingon man ang pag-lisensya sa mga handler o mga indibidwal nga nakigbahin sa paghimo, pagbaligya, pag-import, ug pag-apod-apod sa fertilizers ug pesticides. | Bombo Irene Ardiente
