Gikataho sa DOST-PAGASA nga ang Bagyong WILMA kay makabubo og grabeng pag-uwan sa Kabisay-an ilabi sa Sugbo karon ug ugmang adlawa.
Kini ang eksklusibong gipamahayag ni Engr. Alfredo Quiblat Jr., ang Hepe sa PAGASA Visayas Regional Services Division sa Bombo Radyo Cebu News Team diin gisaysay niini nga sa 24-hour weather forecast sa ilang ahensya kay posibleng makahuwad sa 60-100mm o 250-500,000 drums per square km area sa rainfall o tubig uwan ang bagyong WILMA karong adlawa sa Biyernes, Disyembre 5.
Ingon man ugma sa Sabado, Disyembre 6 kay mas mugrabe pa ang pagbunok sa uwan nga anaa sa 100-200mm o 500,000-1 million drums per square km area sa rainfall o tubig uwan ang masinati sa probinsya sa Sugbo.
Gani sa susamang forecast sa ahensya, gibana-banang mulawig ang bagyo sa Kabisay-an diin ang mga bahin sa Central Visayas, Eastern Visayas, Western Visayas, ug Negros Island Region kay apektado sa bagyo hangtod sa adlawng Dominggo.
Mipahibalo ang opisyal sa publiko nga magpabiling alerto ug mapaalamon sa sitwasyon sa ilang dapit ialbi mas sweto sa ilang mga lugar ang ilang mga Local Government Units pinaagi sa Disaster Risk Reduction Management offices.
