CONSOLACION,CEBU- Pormal nang gi-inagurahan sa lungsod sa Consolacion sa amihanang Sugbo ang pagatukurong New Cebu International Container Port pinaagi sa Groundbreaking ug Capsule Laying Ceremony niini karong adlawa sa Miyerkules, Pebrero 5, 2025.
Nahitabo kini sa Barangay Tayud sa maong lungsod diin gitambogan sa mga opisyales sama nalang nila Consolacion Municial Mayor Teresa “Nene” Alegado, Department of Transportation Secretary Jaime Bautista, Ako Bisaya Partylist Representative Sonny Lagon, Cebu Port Authority General Manager Francisco Commendador III, South Korean Ambassador to the Philippines His Excellency Lee Sang-Hwa ug uban pa.
Ang maong proyekto kay pagapundohan pinaagi sa Public-Private Partnership tali sa nasudnong ahensya sa DOTr, Cebu Port Authority ug sa Export-Import Bank of Korea (KEXIM) sa balor nga dili muminos P16.93-bilyones.
Tukuron kini sulod ka 25 hectares of reclaimed land diin maka-accomodate sa dili muminos 2,000 Twenty-foot Equivalent Unit (TEU).
Ang nakadawat sa kontrata sa maong proyekto mao ang HJ Shipbuilding & Construction Company Limited nga usa ka South Korean-based multinational shipbuilding company ug gilantawang matapos kini sa tuig 2028.
Tinguha niining proyekto sa bag-ong pantalan sa Sugbo maong ang pagpaluag sa mga kapasidad sa karaang container ports sa Metro Cebu.
Sa pakighinabi kang Mayor Alegado nga tinguha niini ang pagpalambo sa ekonomiya dili lamang sa Sugbo apan sa tibu-ok Kabisay-an sa maong makasaysayanong proyektong imprastruktura.
