Luwas nga nakalabang ang Indian-flagged tanker nga adunay karga nga liquefied petroleum gas (LPG) sa Strait of Hormuz, matod sa gobyerno sa India niadtong Sabado, Abril 4.
Diin ang tanker nga Green Sanvi nagdala og anaa sa 46,650 metriko tonelada nga LPG ug adunay 25 ka mga marinero sa dihang kini mitabok sa ruta.
Ang Strait of Hormuz usa ka importante nga ruta alang sa global nga suplay sa lana ug gas, apan ang maritime traffic naapektuhan human sa mga pag-atake sa hangin sa US ug Israel sa Iran.
Sumala sa shipping ministry, 17 ka mga barko nga Indian-flagged nga adunay 460 ka mga marinero sa India ang nagpabilin sa kasadpang rehiyon sa Persian Gulf.
Sumala sa usa ka lokal nga report sa radyo sa India, ang Green Sanvi mao ang ikapitong tanker sa LPG nga padulong sa India nga nakaagi sa Strait of Hormuz sukad sa pagsugod sa gubat sa Middle East.
Ang India nag-import og halos 60 porsyento sa suplay sa LPG niini, ug nag-atubang og kakulang sa gas sa miaging bulan tungod sa mga pagkalangan sa pag-import.
Tungod niini, ang gobyerno nagpatuman og mas hugot nga kontrol sa pag-apod-apod sa natural ug cooking gas, nga nag-una sa mga panimalay ug naglimite sa suplay para sa industriyal nga gamit.
Bisan pa sa mga tensyon, ang India nagpadayon sa pagmintinar sa iyang relasyon sa Iran, samtang gipalapdan usab ang kooperasyon niini sa Israel.
