Iring sa Minnesota nga adunay taas nga ikog, nakalangkat og Guinness World Record

Opisyal nga giila sa Guinness World Record ang usa ka iring sa Minnesota, USA tungod sa taas nga ikog niini nga may sukod nga 18.5 pulgada!

Gihinganlan ang iring og Pugsley ug iya kini ni Amanda Cameron ug sa iyang pamilya.

Matod ni Cameron nga dugay na nilang namatikdan ang talagsaong gitas-on sa ikog ni Pugsley.

Bisan ang mga beterinaryo nahingangha sa talagsaong gitas-on sa ikog niini.

Nakahukom si Cameron nga mag-research sa Guinness World Records, diin nakurat usab sila nga mas taas ang ikog ni Pugsley kay sa kasamtangang naghupot sa record.

Gawas nga usa ka Guinness title holder, si Pugsley nailhan usab nga usa ka mahigalaon ug chill nga iring.