Gibasol sa Israel ug Hezbollah ang Lebanon tungod sa paglapas sa kasabutan sa ceasefire 3 ka adlaw pagkahuman nga gipatuman kaniadtong Miyerkules, Nobyembre 27.
Sa habig sa militar sa Israel, giingon nga ang air force niini miigo sa pasilidad nga gigamit sa Hezbollah sa pagtipig sa mid-range nga mga rocket sa habagatang Lebanon niadtong Huwebes human giingong nakalapas sa ceasefire nga mitapos sa kapin sa usa ka tuig nga panagsangka.
Giingon usab sa Israel nga naglunsad kini og usa ka pag-atake sa gitawag niini nga mga suspek nga adunay mga sakyanan nga nagpadulong sa lain-laing mga lugar sa southern zone nga giingong nakalapas sa ceasefire.
Ingon man sa habig sa Hezbollah, ang magbabalaod sa Hezbollah nga si Hassan Fadlallah nag-akusar sa Israel sa paglapas sa kasabutan diin matod niya, giatake sa kaaway nga mga Israeli ang Lebanese nga namalik sa ilang mga baryo sa utlanan.
Ang Lebanese nga kasundalohan usab sa ulahi nag-akusar sa Israel sa paglapas sa ceasefire sa makadaghang higayon niadtong Miyerkules ug Huwebes.
Kini nga pagbinayloay og mga akusasyon sa duha ka habig nagpakita sa kahuyang sa ceasefire nga gi-negosasyon sa US ug France aron tuldukan ang gubat, nga mibuto gikan sa gubat sa Gaza.
