Sana all nalang jud!
Mao kini ang kasagarang komento sa sa online kabahin sa usa ka gamay nga tech company sa Osaka, Japan nga nagtanyag og libre nga alkohol sa oras sa trabaho ug ‘hangover leave’ aron makabawi sa tulog ug aron dili manakit ang ulo.
Tungod sa grabe nga kompetisyon sa pagkuha sa mga bag-ong empleyado ug limitado nga budget alang sa taas nga sweldo, ang Trust Ring Co. Ltd., usa ka kompanya sa IT sa Midoribashi, Osaka, naghimo og mamugnaong paagi aron madani ang mga fresh graduates imbes nga patas-an ang suholan, nakahukom sila nga himoong mas lingaw ang ilang buhatan.
Niini nga kompanya, dili gidili ang pag-inom samtang nagtrabaho./
Adunay libreng beer machine ug liquor nga makuha sa mga empleyado bisan sa oras sa trabaho.
Ug kung ang mga cheers mosobra, ang hangover leave mahimong magamit aron ma-late, walay pangutana.
Sa pagkakaron, daw epektibo ang ilang stratehiya tungod walay ni-resign kanila sulod sa tulo ka tuig ug nagpabiling maayo ang performance sa kompanya.
Mipadayag usab og habig ang pipila ka mga empleyado, diin ang pagka-flexible ug healthy environment sa trabaho mas importante kanila kaysa sa taas nga sweldo.
Gawas sa ‘hangover leave’, aduna pa’y ‘loss leave’ ang kompanya, diin mahimong mo-absent ang usa ka empleyado kung adunay mahitabong dili maayo sa iyang giidolo nga singer, aktor o celebrity.
