Padayon ang kagamhanan sa dakbayan sa Sugbo, sa pagpangandam sa mga ruta alang sa pagselibrar sa umaabot SINULOG 2026
Mipahibalo si Mayor Nestor Archival sa iyang mga kabalaka bahin sa kaandam sa Siyudad alang sa umaabot nga pagsaulog sa Sinulog 2026.
Human sa usa ka walk-through inspection nga gipahigayon sa dakbayan sa nakalabayng semana, nasuta sa mayor nga adunay tulo ka pangunang peligro sa ruta sa parada: una niini ang mga dalan nga daling mabahaan, walay igo nga suga ug pisikal nga mga babag sa mga sidewalk.
Gipahigayon ang inspeksyon sa tradisyonal nga ruta nga naglangkob sa N. Bacalso Ave., P. del Rosario St., Imus Ave., General Maxilom Ave., Fuente Osmeña Circle ug Osmeña Blvd., nga mobalik sa Cebu City Sports Center.
Atol sa pagsuta niini nasayran nga ang ruta dili pa andam alang sa pagdagsa sa mga performers ug mga tumatan-aw.
Matud ni Archival nga daghang mga bahin sa ruta ang adunay mga lubaong nga mga karsada, ug adunay mga nagpundo nga tubig nga wala mo lahus sa drainage ug possibleng hinungdan sa baha.
Nasayran usab niini nga adunay pipila ka mga poste ang depektibo nga nahimong rason sa kangit-ngit sa ruta, hinungdan nga nabalaka kini alang sa kaluwasan sa mga performers og mga tumatan-aw nga maglatas sa kadalanan, hilabi na nga maabtan og gabie ang selebrasyon.
Usa usab sa mga nakitang hinungdan nga makabalda sa kalihokan sa kadalanan mao ang mga nagbabag sa kadalanan og sidewalks nga posibleng makapeligro usab hinungdan nga mimando kini nga pahawanan sa dili magsugod ang pagsaulog sa Sinulog.
Gilauman usab sa dakbayan nga mas daghan pa ang modagsa sa umaabot nga adlaw kumpara sa nakalabayng tuig, hinungdan nga gipaningkamotan sa dakbayan nga sayuhon pagtapos sa Ritual Showdown, aron sa pagkontrol sa crowd.
