CEBU – Mokabat sa P5.6 million nga kantidad sa kapn 14,000 ka mga fully-grown marijuana plants ang nalarot sa operatiba sa Cebu Police Provincial Office (CPPO) sa usa ka sitio sa Brgy. General Climaco dakbayan sa Toledo.
Padayon ang manhunt operation sa otoridad sa mga responsable sa maong plantasyon, human nga wala matod pa’y naabtan nga suspek ang mga operatiba atol sa operasyon.
Samtang nikabat usab sa P14 million nga balor sa gituhuang shabu ang nasakmit sa Lapu-Lapu City Police Office gikan sa usa ka High Value Target Individual sa Sitio Saac II, Brgy. Mactan dakbayan sa Lapu-Lapu.
Giila ang dinakpan nga si Mark Gil James Cartuciano Dangarang alyas James, 22 anyos, ulitawo, residente sa B. Aranas Ext., Brgy. Fatima dakbayan sa Sugbo.
Lakip sa nakuha gikan niini ang usa ka backpack, usa ka paper bag, ug mga transparent plastic sachets nga adunay sulod nga gituhuang shabu ug ubang gamit.
Ni-abot sa lugar si Lapu-Lapu City Mayor Junard “Ahong” Chan diin gihimug-atan sa Mayor nga dili na paninguhaon pa sa mga durugista nga mosulod sa syudad sanglit dali ra nga mamonitor ang mga nahisgutan, sa otoridad sa Lapu-Lapu City.
Gidayeg usab ni Chan ang kapulisan sa accomplishment niini samtang nag-atubang na ug kaso nga kalapasan sa Republic Act 9165 o Comprehensive Dangerous Drugs Act of 2002 ang dinakpan.
