Gipirmahan sa Kagamhanan sa Probinsya sa Sugbo ang duha ka mahinungdanong kasabutan aron palig-onon ang serbisyong medikal sa lalawigan dungan sa pagpasidungog sa mga “Healthcare Heroes” niadtong Huwebes sa gabii didto sa Capitol Social Hall.
Ubos sa pagpangulo ni Gobernador Pam Baricuatro, ang Memoranda of Agreement (MOA) gitumong aron masulbad ang kakuwang sa mga trabahante sa panglawas ug mapalambo ang kalidad sa serbisyo para sa mga Sugboanon.
Gilangkuban ang maong kasabutan sa scholarship program alang sa mga kursong medikal pinaagi sa kooperasyon sa Cebu Normal University (CNU) ug Vicente Sotto Memorial Medical Center (VSMMC).
Ubos niini, ang mga madasigong estudyante sa medisina makadawat og libreng edukasyon apan kinahanglan silang mohatag og “return service” sa mga komunidad sa Sugbo human sa ilang paggradwar.
Kini giisip nga estratehikong puhunan aron maseguro nga adunay igong suplay sa mga de-kalidad nga doktor sa umaabot nga katuigan.
Gawas sa scholarship, gilusad usab ang Practice-Based Residency Training Program (PBRT) kauban ang DOH Central Visayas ug VSMMC. Pinaagi niini, ang mga doktor nga kasamtangang nagserbisyo sa mga provincial ug district hospitals mahimo nang mokuha og residency sa family medicine samtang nagtrabaho.
Tumong niini nga mahatagan og higayon ang mga doktor nga molambo ang ilang propesyon nga dili na kinahanglan mobiya sa ilang mga dapit nga gialagaran.
Giila usab sa Capitolyo ang sakripisyo sa mga healthcare professionals nga nitabang sa mga surgical ug medical missions sa miaging pito ka bulan, diin miabot sa ₱100,495,800 ang kantidad sa serbisyo nga natatagamtaman sa linibo ka mga pasyente.
Matod ni Dr. Elise Nicole Catalan, ang Capitol Piso Health Consultant, ang maong mga lakang maoy sinugdanan sa pagbalhin gikan sa mga temporaryo nga solusyon ngadto na sa mas malungtaron ug lig-on nga sistema sa panglawas sa tibuok Sugbo.
