CEBU CITY – Gipaboran sa piskalya ang kasong murder batok ni Renato Llenes, ang suspek kinsang mi-angkon sa brutal nga pagpatay sa Grade 9 student nga si Christine Lee Silawan
Kini human nga gibasura sa Lapu-Lapu City Prosecutor’s Office ang gipasaka nga kaso sa National Bureau of Investigation (NBI) VII batok sa 18 anyos nga suspek nga si alyas “Jun” gumikan sa kahuyang sa ebidensya.
Matud sa director sa Lapu-Lapu City Police Office nga si Police Col. Lemuel Obon nga gisiguro nila daan ang mga nahipos nga ebidensya alang sa pagpasaka og kasong batok sa self-confessed killer nga si Llenes.
Tungod niini, gipamatuod ni Obon nga dili “scripted” ang ilang imbestigasyon taliwa sa mga nadawat nga pagsaway gikan sa publiko.
Dugang pa ni Obon nga ang fiscal mismo maoy nagtan-aw sa kalig-on sa kasong gisang-at batok ni Llenes.
Kasamtangang nabalhog si Llenes sa Lapu-Lapu City Jail.
Samtang gihangop ni Police Brigadier Gen. Debold Sinas, ang director sa Police Regional Office-7, ang kalambuan sa kaso sa pagpatay ni Silawan.
Kahinumduman nga gilaplapan ang nawong ni Christine Lee niadtong Marso 10 sa Lapu-Lapu City.
Gi-angkon usab ni Llenes ang pagpatay sa dalagita nga si Silawan gumikan sa iyang konsensya.
