Mipahimangno sa mg ginikanan og mga kabatan-onang Oponganon ang Lapu-Lapu City Police Office (LCPO) nga magpatuman sila sa mas striktong curfew aron mapatigbabaw ang kahapsay sa mga kadalanan sa syudad matag gabii.
Kini ang giawhag sa kapulisa sa dakbayan sa Lapu-Lapu ubos sa pagtuman sa City Ordinance No. 179-2009 diin nagmando sa mga nag-edad og 18-anyos paubos nga ginadiling maglaroy-laroy gawas sa ilang panimalay matag-takna alas 10 sa gabii hagtod alas 5 sa sayong buntag gawas nalang kung gauban kini og hamtong.
Adunay gikatakdang silot ang atubangon sa mga nakalapas sa curfew hours diin sa first offense ay ipalukat ang mga bata sa police station sa ilang mga ginikanan inubanan sa verbal warning, sa second offence kay patambongon na og tunga sa adlaw nga parenting seminar ang mga ginikanan sa dili pa malukat ang mga bata, sa third offense kay pito ka adlaw nga community service sa bata ug ginikanan, ug ingon man sa fourth offense sa muktang P3,000 ngadto sa P5,000 depende sa sitwasyon.
Gikonsiderar kini sa dakbayan isip pagtutok sa parental responsibility sa mga residente diin ang dili makabayad sa multa kay posibleng mag-atubang og pagkabilanggo sa 10 ka adlaw ug pag-atubang sa kalapasan sa Child and Youth Welfare Code (Presidential Decree No. 603) ug ang Special Protection of Children Against Abuse (Republic Act No. 7610).
Gihimug-atan sa LCPO nga ang primerong katuyuan sa ordinansa kay dili ang pasilot sa mga pamilya apan ang pagtuboy sa disiplina sa mga ginikanan sa ilang mga anak ug ang pagpanalipod sa mga batan-on sa mga kagubot sa niob nga kagabhion.
