Nanawagan ang Palasyo sa Malacañang nga dili basulon si Presidente Ferdinand Marcos Jr. sa bisan unsang desisyon nga mahimo sa Senado kalabot sa impeachment trial batok kang Bise Presidente Sara Duterte.
Kini ang gipahayag ni Palace Press Officer USec. Claire Castro human gipangayoan og pamahayag sa posibilidad nga dili na madayon ang impeachment batok kang VP Sara, ilabi na kay nagkatag ang mga draft resolution nga nagbasura sa article of impeachment.
Hangyo sa Opisyal sa Palasyo sa publiko nga ipahilayo sa ilang huna-huna ang ideya nga adunay kalabotan niini si Presidente Ferdinand Marcos Jr.
Matod ni Castro nga ang isyu sa impeachment anaa na sa kamot sa Senado ug ilang responsibilidad ang pagdesisyon kon unsay buhaton kalabot sa impeachment proceedings.
Gisubli sa Palasyo nga ang impeachment anaa na sa kamot sa Senado ug dili na manghilabot niini si Presidente Marcos.
Ingon man nga gusto lang sa Presidente nga magpabilin ang proseso ug due process ug sundon ang anaa sa konstitusyon.
Bahin sa nagpadayong debate nga posibleng mo-crossover sa 20th Congress ang impeachment trial batok ni VP Sara, nitubag si Castro nga adunay kaugalingong ideya ang mga eksperto kon makatabok ba sa 20th Congress ang impeachment trial.
