Nihangyo ang managsuong Duterte sa Korte Suprema nga mandoan ang mga opisyal sa gobyerno sa Pilipinas nga i-arrange ang pagpauli kang kanhi Presidente Rodrigo Duterte.
Sila Bise Presidente Sara Duterte, Paolo Duterte, Veronica “Kitty” Duterte, ug ang acting Mayor sa Davao City nga si Sebastian “Baste” Duterte nagsumite sa ilang memorandum sa Korte Suprema isip kabahin sa gihiusang mga petisyon bahin sa pag-aresto sa kanhi presidente.
Sa petisyon, si Rep. Paolo Duterte, pinaagi sa iyang abogado nga si Atty. Harry Roque, miingon nga ang pagbilanggo sa kanhi presidente dili makatarunganon ug dili konstitusyonal, ug kini usa ka tinuod nga kaso o kontrobersiya nga kinahanglan sulbaron sa Korte Suprema.
Matod niya nga ang Korte Suprema mahimo usab nga modeklarar sa pag-aresto sa kanhi presidente nga ilegal ug dili konstitusyonal.
Mahinumduman nga si Duterte naa sa kustodiya sa International Criminal Court (ICC) sukad Marso 2025 tungod sa usa ka kaso sa krimen batok sa katawhan nga may kalabotan sa iyang kampanya batok sa ilegal nga droga atol sa iyang paglingkod isip presidente ug isip kanhi mayor sa Davao City.
