CEBU CITY-Naka-angkon og grabeng mga samad ang usa ka magti-ayon human nahulog ang ilang sakyanan sa usa ka pangpang sulod sa usa ka subdivision sa Barangay Pit-os sa bukirang bahin sa dakbayan sa Sugbo pasado alas 11 sa buntag niadtong adaw sa Sabado, Disyembre 7, 2024.
Dali kining girespondehan sa mga sakop sa Cebu City Disaster Risk Reduction and Management Office (CDRRMO), Bureau of Fire (BFP) ug ang Cebu City Ambulance human gitaho sa mga residente sa dapit nga adunay duha ka indibidwal nga naaksidente.
Giila ang mga biktima nga mga managti-ayon nga sila Premitivo Paulino, 38-anyos ug si Teresa Maria Comonsad, 36-anyos nga lumulupyo sab sa maong subdivision.
Matod pa sa inisyal nga imbestigasyon nga nahitabo ang aksidente tungod nawalaan sa kontrol ang bana nga drayber dihang miatras kini sa dulhogon nga dapit hinungdan nga natagak na kini sa pangpang.
Midilanat pa sa pipila ka minuto usa na-rescue ang mga biktima human ma trap sa sulod ang asawa nga napiit sa sakyanan.
Nakaangkon og grabeng mga samad ang duha nka biktima hinungdan nga dalitan dayon kini og atensyong medikal gani gidagan pa sa doul nga pribadong tambalanan ang asawa.
Kasamtangang padayon ang gilusad nga imbestigasyon sa Traffic Enforcement Unit sa Cebu City Police Office kun “human error” ba ang hinungdan o “mechanical failure”.
