Usa ka izakaya bar sa Nagoya, Japan nag-atubang og kontrobersiya tungod sa talagsaon nga serbisyo sa kustomer niini.
Ang bar, nga nailhan sa ilang lamian ug crispy chicken karaage, naghatag usab og libre ug literal nga “crispy spankings” sa mga bisita.
Matod sa tagdumala sa maong bar nga ang pagsagpa makamugna og interes sa ilang negosyo, busa nahimo kining epektibong paagi sa pagdani og mas daghang kustomer.
Sa sinugdanan, usa ra ka waitress ang mosagpa – ug buhaton lang kini kung gipangayo kini sa kustomer.
Apan tungod kay nagkadaghan ang mga tawo nga interesado nga makasinati sa serbisyo, ang bar nag-hire og daghang mga babaye nga andam mosagpa og 100 yen o P37 matag usa.
Nasayran nga ang mga customer kay andam mobayad o 500 yen ara lang makapili kung kinsa ang gusto niini nga sagpaon nga waitress.
Busa dili lang mga lokal nga Hapon ang interesado, apil na ang mga langyaw nga turista nga naglinya aron lang sagpaon.
Human mikatap sa social media ang maong video, nagkalain-laing reaksyon ug pagsaway ang nadawat sa maong bar hinungdan nga nakahukom ang manager sa maong bar nga hunongon na ang serbisyo.
Dili klaro kung kanus-a gyud nila gipahunong ang serbisyo, bisan kung wala na kini, nahinumduman gihapon kini sa kadaghanan, ingon usa sa labing ‘talagsaon’ nga paagi sa pag-apil sa kustomer sa eksena sa bar sa Japan.
