CEBU CITY-Mibutyag ang usa ka residente sa Barangay San Isidro, San Fernando nga si alyas “jane” nga napugos siya og pamakak sa Department of Social Welfare and Development (DSWD-7) aron nga makadawat sa Social Ameloriation Program (SAP) .
Gisaysay ni alyas Jane sa Bombo Radyo Cebu sa tulumanong Bombo Barangayan nga sa ikaduhang hugna sa SAP giingnan matud pa siya sa iyang kabanay nga iyang pangalan nalista sa form sa mga makadawat sa ayuda. Hinungdan nga milinya dayon si Jane bisan ug naa siya’y trabaho aron mangiyawat sanglit ang pipila ka mga milinya ang aduna usab mga trabaho apan namakak matud pa kini aron lamang malista ug makakuha sa financial assistance.
Apan giklaro hinoon ni Jane nga wala siya nakakuha sa ayuda atol na sa payout human nasuta matud pa nga aduna siyay trabaho ug nauwawan matud pa gumikan kay milinya kini sa payout.
Gani, gibutyag pa niini nga ang mga nakakuha sa ilang kwarta kun ayuda ang gipadala pa og 50 pesos isip bayad human nila kini claim.
Wala usab matud pa kini nasayod kung naa bay gihimo ang barangay kalabot niini sanglit ang DSWD man matud pa ang mi-asister sa pagpanglista.
Mensahe nalang ni alyas Jane sa ahensya nga tarungon gyud ang pagvalidate sa lista.
Padayon usab nga gikab-ot sa Bombo Radyo Cebu ang habig sa DSWD-7 kalabot niining maong alegasyon ug kanunay nga abli ang sibya-anan sa ilang habig.
