Giklaro sa National Security Council (NSC) nga ang tulo ka mga Pinoy nga gikataho nga nadakpan sa China kay mga ordinaryong lungsuranon ug dili mga espiya.
Sa usa ka pahayag, ang tigpamaba sa NSC nga si Ass. Director-General Jonathan Malaya miingon nga ang ahensya naalarma sa mga kaso sa espiya nga giakusahan sa People’s Republic of China batok sa 3 ka mga Filipino.
Gitumbok sa opisyal sa NSC nga ang 3 ka mga Filipino nga nadakpan mga kanhi nakadawat sa Hainan Government Scholarship Program nga gitukod pinaagi sa kasabutan tali sa mga probinsya sa Hainan ug Palawan nga naghatag og scholarship sa 50 ka mga scholar gikan sa Palawan aron makatungha sa Hainan National University.
Giinsistir usab sa opisyal nga kini mga ordinaryong lungsuranon nga walay military training nga miadto lamang sa China tungod sa imbitasyon sa gobyerno sa China aron magtuon.
Dugang pa, sila masinugtanon sa balaod ug walay mga kriminal nga record ug gisusi pag-ayo sa gobyerno sa China sa wala pa moabut sa ilang nasud.
Gikwestiyon usab sa NSC ang gitawag niini nga edited video nga gipagawas sa Chinese media nga nagpakita sa giingong pagsugid sa mga dinakpan nga mga Filipino.
Lakip ang bahin sa gisulti sa usa sa mga Pilipino samtang nagpahayag sa iyang pagmahay nga klaro nga naghulagway sa China sa positibo nga kahayag.
Gihisgotan usab niini ang Philippine Intelligence Agency o Philippine Spy Intelligence Service, nga matod niya wala maglungtad isip ahensya sa gobyerno. Busa, matod niya, daw scripted ang mga pagsugid sa mga dinakpan nga Pilipino.
Ang pagkasikop sa 3 ka mga Pinoy kay gilantaw usab nga balos sa China sa sunodsunod nga lehitimong pagdakop sa mga Chinese spies ug sa ilang mga kakunsabo dinhi sa Pilipinas sa miaging mga buwan.
Kalabot niini, gipasalig sa NSC nga ilang prayoridad mao ang kaluwasan ug kaayohan sa mga Pilipinong nasikop diin ang ahensya padayong makigtambayayong sa Department of Foreign Affairs (DFA) ug sa Philippine Embassy sa China aron maseguro nga makadawat sila og tukmang legal nga suporta ug due process taliwala sa mga seryosong akusasyon nga gipasaka batok kanila.
Giawhag usab sa gobyerno sa PH ang gobyerno sa China nga respetuhon ang katungod sa mga dinakpan nga Pilipino ug hatagan sila og higayon nga malimpyohan ang ilang mga pangalan, sama sa pagrespeto niini sa katungod sa mga Chinese national sa Pilipinas.
