CEBU-Dako ang posibilidad nga gipulitika sa administrasyon ni Presidente Ferdinand Marcos Jr. ang lakang sa Department of Agriculture nga himuon nga P20 matag kilo sa bugas nga magsugod na sa pagbaligya karong Lunes, Abril 28 sa nagkadaiyang LGUs sa lalawigan sa Sugbo.
Kini maoy gipamahayag ni Nick Abasolo, ang Chairperson sa Kilusang Magbubukid Pilipinas Cebu Chapter nga matod pa nga dungan sa iyang pagkuwestiyon nganong ila kining gihimo karon ilabi na nga mao kini ang gisaad ni Presidente Marcos Jr. atol sa iyang kampanya.
Hinungdan, nga nagduda sila nga dako ang posibilidad nga adunay politikanhong implikasyon kining maong programa ilabi na nga pipila na semana og adlaw na sa piniliay.
Gihimug-atan niini, nga nabalaka ang mga mag-uuma nga magutman sila tungod kay walay tinuod nga programa ang gobyerno alang kanila.
Dugang ni Abasolo nga pabiling apektado ang agrikultura ug dili na masustiner sa mga mag-uuma ang ilang kaugalingon tungod kay wala silay kagamitan ug kapital nga gihatag kanila.
Sa pikas bahin, gitino sa usa ka ka vendor ang mga pulong nga “President Bongbong Marcos.Gawa muna bago salita..”
Kini ang sentimento ni Marvin Sevilleno, usa ka vendor, kalabot sa nahisgutang programa.
Nanghinaot si Sevileno nga mapalapad ang maong programa ngadto sa kinabag-an sa katawhan nga makabenepisyo niini.
Bisan pa niini, aduna ra gihapoy pagsalig si Sevilleno sa gobyerno ug andam siyang modugang sa iyang kinatibuk-ang pagsalig kung matuman ang pasalig sa administrasyong Marcos Jr. sa pagpaubos sa presyo sa bugas.
