CEBU CITY-Nagpadayon ang gipahigayon nga imbestigasyon sa Cebu City Council nga adunay kalabotan sa dul-an P200 million nga cash advance payment alang sa flood-control projects sa dakbayan apan wala pa napatuman hangtud karun.
Gipahibalo ni Cebu City Councilor Jerry Guardo, ang chairman sa Committee on Infrastructure, nga subli silang mopahigayon og executive session karung umaabot nga Oktobre 4, diin tambongan kini sa mga kadagkoan sa Department of Engineering and Public Works (DEPW), mga department heads, ang mga nalambigit sa bidding process, ingon man ang Bids and Awards Committee (BAC), arun nga mahatagan gayud og katin-awan ang konseho kung nganong hangtod karun wala pa man mapatuman ang maong proyekto.
Matud pa sa konsehal, dakong tabang ang maong proyekto sa problema sa baha sa dakbayan ilabi na karun nga nagsugod na usab ang pag-uwan uwan hinungdan nga ilaha gayud kining gihatagan og dakong pagtagad.
Giingong dul-an na sa duha katuig apan wala pa gayud masugdi ang maong proyekto, butang nga kinahanglan nang tuki-on sa konseho.
Ang naasoy nga P1.3 billion nga proyekto naglangkod sa pagtukod sa mga flood-mitigating interventions sa Cabreros St. – N. Bacalso Ave. – V.H. Garces St.; A. Gabuya St; ug Leon Kilat St.- Escano St., ning dakbayan.
Samtang, gitino usab ni Guardo nga ang maong proyekto kay na ‘bid up’ niadto pang panahon ni anhing Mayor Edgardo Labella.
Kahinumdoman nga una nang gikwestyon sa Comission on Audit (COA) ang giingong “excessive” nga P199.323 million cash advance payment sa Cebu City government niadtong tuig 2021 alang sa drainage project apan ang konstruksyon niini kay nagpabilin nga walay pagsibog hangtud sa kataposan sa tuig 2022.
Nagkanayon ang COA nga ang maong kasaypanan kay naka-kompromiso sa interes sa City Government ug sa kinatibuk-ang publiko sa dakbayan.
