Gisusi usab sa Philippine Army (PA) uban sa Philippine National Police (PNP) ang taho kalabot sa pipila ka mga reservist nga giingong nalambigit sa ‘Angels of Death’ o private army sa napriso nga founder sa KOJC nga si Apollo Quiboloy.
Matod ni Army Chief Public Affairs Deputy Chief Col. Reynaldo Balido Jr., pipila sa mga sakop sa KOJC kay mga reservist.
Kaniadtong tuig 2015, ang istasyon sa KOJC nga Sonshine Media Network Incorporated (SMNI) gi-akreditado isip usa kauban nga reservist unit sa PA.
Sa pagkakaron, anaa sila sa active duty status nga gitawag og 2nd Signal Battalion Philippine Army Affiliated Reserve Unit ug giingong napili sila tungod sa ilang kahanas sa komunikasyon.
Apan gipasabot sa opisyal sa PA nga kontrolado lang sa ahensya ang mga reservist sa maong mga unit panahon sa gubat ug nasudnong emerhensiya.
Giklaro usab sa opisyal nga kinahanglang walay armas ang maong mga reservist.
Matod niya nga bisan og mapamatud-an nga nakalapas ang SMNI, bawion ang ilang kalambigitan sa Army ug pasakaan sila og kasong administratiba lakip na ang kadagkoan sa kompanya nga nagsilbi nga commander sa unit ang mag-atubang sa pagkuwestiyon.
