NAGA CITY,CEBU- Pormal nang gipasaka sa mga otoridad ang kasong murder ug two counts of parricide batok kang Carlo Camporedondo, 33, kalabot sa pagpatay sa iyang live-in partner ug duha ka mga bata sa Barangay Lutac, City of Naga, niadtong Enero 27,2025.
Gipaubos usab kini ug inquest proceedings sulod sa Vicente Sotto Memorial Medical Center kagahapon Huwebes, Enero 30, 2025.
Mag-atubang kini sa kasong murder batok sa iyang kapuyo ug duha ka ihap sa parricide sa kamatayon sa iyang duha ka menor-de-edad nga anak.
Matod pa ni Police Lt. Col Verniño Noserale, ang hepe sa Naga City Police Station nga human sa pagduso sa mga kaso kay magpa-abot kini sa resolution gikan sa prosecutor’s office aron mapasa na kini sa korte.
Dugang ni Police Lt Col Noserale, nga pasakahan usab sa kapulisan og kasong direct assault ang suspek human nga nisuway kini og sukol atol sa pagdakop kaniya sa hot pursuit operation pinaagi sa pagtigbas sa mga pulis gamit ang sundang nga iya usab nga gigamit sa pagpatay sa pamilya niini.
Gikompirmar ni Noserale nga gisusi sa kapolisan kung giunsa kini nga mga hinungdan, lakip ang sugal ug kapit-os sa panalapi, mahimo’g nakatampo sa trahedya.
Una na usab nga nahinabi s Bombo Radyo Team ang mga sakop sa pamilya ni Camporedondo, nga nag-angkon nga ang iyang mga isyu sa kahimsog sa pangisip misamot sa paglabay sa panahon.
Gidugang pa niini, nga naospital siya sa miaging tuig alang sa usa ka psychiatric evaluation apan nagpadayon sa paggamit sa shabu, nga nakaapekto sa iyang pamatasan.
Samtang, ang naluwas nga 7-anyos nga anak sa magtiayon, kinsa nagtungha atol sa insidente, gipaubos sa pag-atiman sa City Social Welfare and Development Office alang sa counseling ug psychological support.
Gumikan niini ang ang maong panghitabo ‘case solved’ na og nagpaabot nalang sa hearing sa korte ang mga awtoridad.
