CEBU CITY — Gikwestyon ni Cebu Provincial Governor Gwendolyn Garcia ang namunuan sa Mactan-Cebu International Airport Authority (MCIAA) gumikan sa giingong pagpasulod sa mga langyaw sa Sugbo.
Kini bisan pa man og gidid-an na sa provincial government ang tanang arrivals sa domestic ug international arrivals ubos sa usa sa ilang mga executive orders.
Sa press conference sa kapitolyo, nagkanayon si Garcia nga niabot sa Sugbo ang 38 ka mga langyaw niadtong Marso 27 alang sa mga “sweeper flights” pabalik sa ilang mga nasud.
Gihulagway sa gobernadora nga gihimong sudlanan ang lalawigan sa mga langyaw bisan pa man sa mas striktong lakang sa gobyerno batok sa COVID-19.
Dugang pa ni Garcia nga nag-check in sa duha ka mga hotel sa Lapu-Lapu City ang nahisgutang mga langyaw human mitugpa ang gisakyang private plane.
Tun-an karon sa gobernadora ang ilang sunod nga lakang human sa nahitabong pag-abot sa mga langyaw sa inilang airport sa Sugbo.
