Gipaabot nga isumiter sa International Criminal Court (ICC) karong umaabot nga Lunes, Marso 17, ang katin-awan sa kampo sa gobyerno kalabot sa mando sa Korte Suprema nga ipasabot ang pagdakop, detensyon ug pagsurender ni kanhi Presidente Rodrigo Duterte ngadto sa International Criminal Court (ICC).
Kini gipaabot nga isumiter ni Solicitor General Menardo Guevarra kinsa nakadawat sa gisilbi nga kopya sa kamanduan kagahapon, Biyernes, Marso 14.
Kahinumdoman nga ang show cause order nga giluwatan sa SC niadtong Huwebes sa gabii naglangkob sa kamandoan sa pagpasabot human maaksyonan ang 3 ka habeas corpus petitions nga gisang-at sa mga anak sa kanhi Presidente nga sila si Davao City Mayor Sebastian “Baste” Duterte ug Veronica “Kitty” Duterte niadtong Marso 12.
Gihatagan sa korte ang gobyerno og 24 oras sa pagtubag niini, apan tungod kay ang deadline mahulog sa katapusan sa semana, ang mga respondents mahimong mosumite sa ilang katin-awan sa adlawng Lunes.
Gawas kang Guevarra, lakip sa mga respondents mao sila si Executive Secretary Lucas Bersamin, Department of the Interior and Local Government (DILG) Secretary Jonvic Remulla, Philippine National Police (PNP) Chief General Rommel Marbil, PNP-CIDG Chief Gen. Nicolas Torre III, Foreign Affairs Secretary Enrique Manalo, Armed Forces of the Philippines (AFP) Chief of Staff Romeo Brawner Jr. Executive Director sa Philippine Center on Transnational Crime (PCTC) Undersecretary Lt. Gen. Antonio Alcantara, Capt. Johnny Gulla ug ang Bureau of Immigration (BI).
