CEBU CITY-Gikatakdang isumiter ni Cebu City Acting Mayor Raymond Alvin Garcia ang recommendation letter ngadto sa pamunoan sa Philippine National Police sa Kampo Crame sa Quezon City sa wala pa mutongtong ang buwan sa Oktubre sa nauyunan niini isip mahimong permanenting hepe sa kapulisan sa Cebu City Police Office (CCPO).
Giklaro sa Acting Mayor nga kuntento ra kini sa performance ni OIC-City Director Police Col. Antonietto Cañete sa pagdumala sa kapulisan sa dakbayan human gihulipan sa pwesto si former City Director Police Colonel Ireneo Dalogdog niadtong Hulyo 26, 2024.
Nakasugat man sa mga dagkong krimen ang pamunoan ni Cañete sama sa “broad daylight robbery” sa duha ka jewelry store sa Ermita ug kamatayon sa usa ka saleslady sa panimalay niini sa Bulacao.
Kung diin daling naaksyonan sa mga sakop sa kapulisan ang maong mga krimen ubos sa pagdumala ni Col. Cañete.
Unang gikataho nga lima ka mga opisyal sa kapulisan unta ang pili-anan sa Acting Mayor apan si Police Lt. Col. Dyan Agustin kay bag-ohay lang natudlo isip acting director sa Lapu-Lapu City Police Office (LCPO).
Ang nahabilin nga mga pangan nga anaa sa lista gawas kang Col. Cañete kay sila; Police Lt. Col. Arnel Banzon, nga kasamtangang nadestino sa Negros Oriental; Police Lt. Col. Jovito M. Atanacio, kasamtangang hepe sa Police Regional Office-7 Information and Communications Technology Management Division; ug si Police Lt. Col. Randy Caballes ang kanhi hepe sa Talisay City Police Station.
Pasalig ni Garcia nga sa dili pa matapos ang buwan kay aduna nay nasumiter nga hepe ang kapulisan sa dakbayan sa Sugbo.
