Gipasalig ni Presidente Ferdinand “Bongbong” Marcos Jr. nga ang mga residente nga naapektuhan sa Bagyong Tino makadawat dayon og tabang, human niya gimandoan ang tanang ahensya sa gobyerno nga moresponde dayon sa katalagman.
Sumala sa Presidential Communications Office (PCO) ug Palace Press Officer Undersecretary Claire Castro nga ang mga ahensya sa gobyerno kay anaa na sa mga apektadong lugar aron maghatud og pagkaon, tambal, ug uban pang mga batakang panginahanglan.
Gipahibalo ni Castro nga ang Department of Health (DOH) nagpadala dayon og mga tambal, limpyo nga tubig nga mainom, mga hygiene kits, ug mga sudlanan sa tubig sa Cebu, Aklan, ug Eastern Visayas, ang pipila sa mga rehiyon nga labing naapektuhan.
Giingon usab sa DOH nga padayon nila nga gimonitor ang posibleng hulga sa lahar gikan sa Bulkang Kanlaon tungod sa padayon nga pag-ulan.
Samtang, ang Department of Social Welfare and Development (DSWD) nag-apod-apod na og kapin sa 121,000 ka family food packs ug 1,600 ka ready-to-eat meals sa mga rehiyon sa CALABARZON, Bicol, Visayas, Caraga, ug mga bahin sa NCR ug Zamboanga. Naghatag usab kini og tabang pinansyal sa mga pamilya nga nawad-an og mga minahal sa kinabuhi ug init nga pagkaon sa mga na-stranded nga pasahero ug mga motorista.
Sumala ni Castro, ang mga miyembro sa Gabinete padayon nga nagmonitor sa sitwasyon aron masiguro ang paspas nga paghatud sa tabang sa tanang apektadong mga lugar.
Samtang, si DICT Secretary Henry Aguda nagtaho nga ang ahensya nakigtambayayong sa mga dagkong kompanya sa telekomunikasyon aron mapadali ang pagpahiuli sa komunikasyon sa mga lugar nga naapektuhan sa bagyo.
