Mibisita si Presidente Ferdinand “Bongbong” Marcos Jr. sa Bohol gahapon Hunyo 28, 2024, nga nagtimaan sa iyang unang pagbisita sa probinsiya sukad sa iyang pagkapili niadtong 2022.
Kini gumikan kay si President Marcos maoy mangulo sa pag-apod-apod sa hinabang pinansyal ngadto sa mga mag-uuma ug mangingisda, ilabina niadtong grabeng naapektuhan sa El Niño.
Labing menos 10,000 ka mga benepisyaryo ang nakadawat og hinabang pinansyal gikan sa presidente, nga adunay gibana-bana nga 2,500 ka mga benepisyaryo gikan sa Tagbilaran City ug 2,500 gikan sa matag tulo ka distrito sa Bohol, nga gipahigayun sa Carlos P. Garcia Sports Complex sa Tagbilaran City.
Tumong niini nga makabangon ang mga mag-uuma, mangingisda ug mga pamilya nga na-apektohan sa krisis sa El Niño sa Central Visayas.
Ang Presidente mitunol sa agri-fishery assistance packages, lakip na ang mga makinarya sa panguma, kagamitan sa pangisda, mga liso ug mga abono isip kabahin sa padayon nga pasalig sa Department of Agriculture (DA) sa pagpauswag sa sektor sa agrikultura taliwala sa mga hagit nga dala sa krisis.
Human sa pag-apod-apod sa mga serbisyong suporta, nanghatag ug cash assistance nga nagkantidad ug PhP10,000 gikan sa Bohol ug Cebu, ingon man ang PhP100 milyones nga hinabang pinansyal ngadto sa duha (2) ka Gobyerno sa Probinsiya.
Mitambong usab sa maong kalihokan ang ubang mga ahensya sa gobyerno sama sa Department of Trade and Industry (DTI), Department of Labor and Employment (DOLE), Technical Education and Skills Development Authority (TESDA), ug Office of House Speaker Ferdinand Martin Romualdez.
