Hingpit nga nakasabot si Presidente Ferdinand Marcos Jr. sa kasuko sa publiko tungod sa kurapsyon sa mga flood control projects ug uban pang infrastructure projects, ug iyang giangkon nga kung ugaling dili pa siya ang Presidente, lagmit anaa siya sa kadalanan uban sa mga nagprotesta.
Gipahayag sa Presidente nga makatarunganon ang kasuko sa publiko sa gibutyag nga mga iregularidad.
Matud pa sa Presidente, siya mismo ang nagpagawas sa anomaliya ug interesado siya nga mangita og solusyon sa usa ka seryoso kaayo nga problema, matud niya, dili mabasol ang mga tawo sa pag-adto sa kadalanan ug pagpahayag sa ilang tagsa tagsang gibati.
Nunot niini, nag-awhag ang Presidente sa publiko nga patubagon ang mga opisyal sa gobyerno ug pribadong indibidwal nga nalambigit sa mga anomaliya, ug aron masiguro nga sila adunay tulubagon sa ilawom sa balaod.
Gipahinumdoman usab sa Presidente nga kinahanglang magpabiling malinawon ang mga aksyong protesta, nga nagpasidaan nga obligado ang mga awtoridad nga molihok kung kini mahimong bayolente.
