CEBU PROVINCE-Himuon pinaagi sa raffle ang pagpili sa mga tunghaan nga puy-an sa mga contingent sa Pasigarbo sa Sugbo nga ipahigayon sa Carcar City, sunod buwan, kana matod pa ni Cebu 5th district Provincial Board Member Andrei “Red” Duterte, chairman sa Committee sa Turismo.
Gitino ni Duterte nga aduna na silay listahan sa mga tunghaan nga mahimong gamiton sa mga contingent gikan sa 50 ka lungsod ug siyudad sa probinsiya.
Una nang gideklarar ni Carcar City Mayor Patrick Barcenas nga 23 na ka mga tunghaan ang napili nga puy-an sa mga partisipante.
Apan, giangkon ni Duterte nga kon kulang sa kapuy-an, ila usab nga gipahibawo ang mga silingang lungsod sa San Fernando ug Sibonga.
Kung kahinumduman, nga niadtong Miyerkules, Hulyo 19, mibisita si Cebu Governor Gwendolyn Garcia sa Carcar City Sports Center aron tan-awon kung giunsa ang pag-andam sa venue alang sa Pasigarbo sa Sugbo karong Agosto 27, 2023.
