CEBU CITY-Gihimug-atan ni Virgie Dela Cerna, usa ka PWD nga una na nga midangop sa Bombo Radyo Cebu aron mapadayag ang iyang kasagmuyo isip usa ka vendor nga nanginabuhi.
Nagtoo kini nga nasuko kaniya si Raquel Arce, ang head sa Prevention, Restoration, Order, Beautification, Enhancement (PROBE) team.
Gibarugan ni Dela Cerna sa dihang mahinabi sa Bombo Radyo sa programang Zona Libre nga gitawag matud pa siya ni Arce ug “kimpang nga nagpabombo” butang usab nga una na nga gihimakak sa pangu sa probe.
Imposible matud pa kini sigon ni Virgie sanglit daghan man ang nakabati. Gani niadtong gihangyo pa niini si Arce nga ibalhin siya pwesto nga dapit sa usa ka dako nga mall sa P.Lopez St., giingnan usab kini ni Arce kung boot ba siyang magpabuak sa ulo sa mga muslim kung mubalhin gyud siya.
Hinungdan nga dako ang iyang pagtoo nga gikalagotan siya ni Arce gumikan kay midangop sa Bombo Radyo. Dugang pa niini, duna matud pay ‘pabor-pabor’ sa maong sitwasyon gumikan kay si Edna Niliso ang head matud pa sa PUSVA ang gipaboran ni Arce.
Gisaysay matud pa ni Edna ngadto ni Dela Cerna nga sayo pa sa buntag mimata na kini ug miadto sa balay ni Arce para muhangyo ug nagdala pa og usa ka dosenang mangga.
‘Dili tinood‘
Midepensa si Raquel Arce, PROBE team head, sa mga sumbong batuk kaniya. Gibutyag ni Arce nga kadtong PWD nga namasangil nga gitawag niini ug “Kimpang nga nagpa-Bombo“, giingung dili kini mao ang mga pulong nga migawas sa iyahang baba.
Matud ni Arce nga dili kimpang inay “disable” ang termino nga iyahang gigamit. Sigon pa nga dili niini makaya nga magyaga-yaga gumikan kay siya mismo ang adunay PWD nga igsuon.
Gipasabot niini nga iyaha ra kining gipangita arun nga mahatagan ug pwesto sa Tabo sa Banay apan hugot niini nga gihimakak ang nahisgutang pasangil.
Samtang, mipasabot usab kini sa iyahang gipadayag ngadto sa usa ka vendor nga, “buk-an ug ulo”, giingung wala siya manghulga ug iyaha lang kadtong ekspresyon.
Gibutyag ni Arce nga wala niini hatagi ug higayon ang maong mihangyo kaniya gumikan kay sa maong area aduna usab kini gipapahawa nga mga Muslim vendor hinungdan nga wala na gayud kini pabalikon sa dalan P.Lopez.
Gitataw sa demolition team head nga gusto lang niini nga mahimong patas arun nga dili mapasanginlan nga adunay gipaboran.(FDP/SBR)
