CENTRAL VISAYAS- Gilusad sa Police Regional Office-7 ang “Regional Tactical Drone Squad” atol sa flag raising ceremony niini sa PRO 7 grounds, karung adlawa Lunes, Abril 14, 2025.
Kini nga paglusad aron mapalapdan ang “surveillance capacity” sa kapulisan sa Central Visayas.
Gilangkuban kini sa tactical drone squad og anaa sa 55 ka mga sakop sa lisensyadong drone operators nga kompleto sa mga HD camera.
Gipanglantawan sa PRO 7 nga ipakatap kini karong umaabot nga Semana Santa ug National and Midterm Elections-2025 sa Mayo, isip pagpangandam sa pagdagsa sa mga tawo .
Subay niini si Police Brigadier General Redrico Maranan, ang Regional Director sa PRO-7, nga kabahin kini sa modernisasyon sa kapulisan sa rehiyon.
Gipanglantawan usab sa buhatan nga mahatagan ang matag Police Office og “Operational Drone” nga magamit sa surveillance monitoring ug police operations.
Giingong magamit usab kini sa simulation exercises sa kapulisan sama sa hostage operations.
Dugang pa, sugdan ang deployment sa mga drone sa mga pantalan, tourist spots, karung Semana Santa o Holy week.(With reports of Bombo Rexmond Omega and Bombo Irene Ardiente)
