Gikompirmar ni Senate President Vicente “Tito” Sotto III nga si Senate President Pro Tempore Panfilo “Ping” Lacson na usab ang mangulo sa gamhanang Senate blue ribbon committee, pipila ka semana human siya nikanaog sa katungdanan.
Matod ni Sotto, nakahukom si Lacson nga mobalik isip chairperson sa komitiba human sa panawagan sa daghang mga kaubang senador ug publiko.
Kahinumduman nga si Lacson ni-resign niadtong Oktubre 6 human ang pipila ka mga senador gikatahong wala matagbaw sa direksyon sa imbestigasyon sa komitiba sa mga anomaliya sa mga proyekto sa flood control.
Si Senador Erwin Tulfo temporaryo nga nihulip kaniya isip acting chairman sa komitiba.
Sa sayo pa, si Lacson niingon nga kon mobalik siya isip committee chairman, kinahanglang mangandam si Sotto sa posibleng epekto niini sa iyang pamunoan sa Senado.
Matod niya nga dunay mga sakop o kauban sa majority bloc nga posibleng mobiya sa ilang grupo ug mahimong maapektuhan ang liderato ni Sotto.
