Gidepensahan ni Senate President Pro Tempore Jinggoy Estrada ang desisyon sa Senado nga i-postpone ang pagsugod sa impeachment proceedings batok kang Bise Presidente Sara Duterte ngadto sa Hunyo 11.
Diin ang orihinal nga gikatakda karong Lunes, Hunyo 2 dili na mahinayon ug ngadto na sa Hunyo 11 ipresentar ang Articles of Impeachment sa plenaryo sa Senado diin magtigom ang impeachment court ug manumpa ang mga senador isip mga mohukom.
Matod ni Estrada, bisan og usa sa mga tahas ug responsibilidad sa Senado mao ang paglihok isip impeachment court, apan ang ilang nag-unang mandato mao gihapon ang paghimo og mga balaod.
Busa matud sa senador nga angayan lang nga ipasar una ang mga priority bills ilabina nga pipila na lang ka adlaw ang nahabilin sa dili pa ang ‘sine die adjournment’ sa Kongreso.
Matod usab niya nga subay kini sa naabot nga kasabotan sa LEDAC meeting nga gilangkoban sa executive, senate, ug chamber.
Gumikan unom na lang ka adlaw sa session ang nahabilin sa ika-19 nga Kongreso tungod kay ablihan na usab ang ilang sesyon sa Hunyo 2 ug hingpit nga tapuson sa Hunyo 13.
