Patay ang usa ka 24-anyos nga single mother human giingong gi-dunggab ug gi-matrilyo sa iyang kanhi uyab tungod kay wala makadawat sa ilang panagbuwag sa Barangay Carreta, dakbayan sa Sugbo, Huwebes, Disyembre 11, 2025.
Giila ang biktima nga si Fercy Paculaba, samtang ang suspek mao si Christian Labarez, residente sa Mandaue City.
Sa eksklusibong pakighinabi sa Bombo Radyo Cebu News Team, gisaysay sa igsuon sa biktima nga si Alyas Inday Paculaba, nga pirme nga maglalis ang duha sulod sa ilang mubo nga relasyon tungod sa kaseloso sa lalaki.
Giingong dili makadawat si Labarez sa 6-anyos nga anak sa biktima nga laing lalaki ang amahan. Tungod sa dili na makaya nga kinaiya sa lalaki, nakigbuwag ang biktima, nga maoy hinungdan sa kalagot sa suspek.
Subay sa report, ang gamayng anak sa biktima nakaangkon og kahadlok ug nakasaksi mismo sa pagpamatay sa iyang inahan.
Samtang padayon ang imbestigasyon, misurender usab si Labarez ug personal nga mitahan sa kapulisan sa Mabolo Police Station.
Sumala ni Police Major Eric Gingoyon, hepe sa Mabolo Police Station, miangkon si Labarez nga iyang giatake si Paculaba atol sa usa ka komprontasyon sulod sa balay sa biktima.
Gipasanginlan pa niini ang biktima nga misulay sa pagdunggab kaniya gamit ang kutsilyo, hinungdan sa ilang panag-away nga miresulta sa kamatayon sa biktima.
Sa pikas bahin, ang igsuon sa suspek nga si Ronell Labarez, miingon nga dili siya makatuo nga nabuhat kini sa iyang gsoon, ilabi na kay buotan kini nga pagka-anak.
Padayon ang mas lawom nga imbestigasyon sa kapulisan samtang giandam na ang kaso batok sa suspek.
