Gidayeg ni Speaker Ferdinand Martin G. Romualdez ang Philippine National Police (PNP), ubos sa kamandoan ni General Rommel Marbil, tungod sa paspas nga pagkasikop sa mga suspek sa pagdagit ug pagpatay sa Filipino-Chinese nga negosyante nga si Anson Que ug sa iyang driver.
Matod ni Speaker Romualdez, kini nagpakita sa determinasyon sa administrasyon ni Presidente Marcos sa paghatag og hustisya ug pagpanalipod sa publiko batok sa organisadong krimen.
Kini usab pamatuod nga ang mga institusyon sa pagpatuman sa balaod adunay igong kapasidad sa pagsulbad sa mga kaso nga walay pagpaagas sa dugo.
Gipasalamatan usab sa lider sa Kamara si Presidente Ferdinand R. Marcos Jr sa iyang hugot nga suporta sa PNP sa paggukod ug pagdakop sa mga suspek.
Giila sa PNP ang mga suspek nga sila si Ricardo Austria David, Raymart Catequista, ug David Tan Liao nga anaa karon sa kustodiya sa PNP Anti-Kidnapping Group.
Si Liao, usa ka Chinese national, gikatahong boluntaryong mi-surrender ug miangkon sa iyang kalambigitan sa krimen.
Laing duha ang nasikop sa operasyon sa kapulisan sa Palawan niadtong Biyernes.
Nailhan usab si Que, nga Anson Tan, ug ang iyang driver nga si Armanie Pabillo, gikatahong missing niadtong Marso 29 human nilarga sa ilang buhatan sa Valenzuela City.
Ug sunod adlaw niana kay usa ka ransom demand nga nagkantidad og $20 milyon ang gipadala sa iyang pamilya pinaagi sa WeChat.
Apan, duha ka patayng lawas ang napalgan sa Rodriguez, Rizal ug gikompirmar nga sila si Que ug Pabillo pinaagi sa forensic evidence.
