CEBU-Nakakuha usab og dako nga kahigayon ang Sugbo sa sektor sa Meetings, Incentives, Conferences and Exhibitions (MICE) sa pagpangandam niini sa paghost sa kapin 500 ka mga executives ug mga stakeholders sa industriya sa civil aviation gikan ssa nagkadaiyang mga nasud sa Asya ug Pasipiko.
Kini human gibutyag ni Civil Aviation Authority of the Philippines (CAAP) Chief of Staff Atty. Edeliza Iruguin ngadto kang Cebu Provincial Governor Gwendolyn Garcia ang maong kalihukan atol sa panagtigom niini sa Kapitolyo sa Sugbo kagahapon, Lunes Spetiyembre 23, 2024.
Ang kalihokan kay mao ang “59th Conference of the Directors General of Civil Aviation – Asia and the Pacific regions” nga ipahigayon sa umaabot Oktubre 14 hangtud 18 diri sa lalawigan sa Sugbo.
Pagasugdan ang maong kalihukan sa paghikay sa kapitolyo ug “welcome dinner” para sa mga delegado sa gabii sa Oktubre 14.
Pagatambongan kini nilang Transportation Secretary Jaime Bautista ug CAAP Director General Manuel Antonio Tamayo uban sa mga director generals ug mga stakeholders sa industriya sa civil aviation gikan sa 47 ka mga member states ug mga representate sa 15 ka international organizations sa paghisgot sa mga diskusyon sa industriya.
Ang panguna nga mga hilisgutan naglakip sa kaluwasan sa mga eroplano, seguridad, nabigasyon sa kahanginan, mga epekto sa kalikopan, ug ang pag-uswag sa ekonomiya sa transportasyon sa kahanginan.
Ang mga nasud sa USA, UK, Australia, Canada, France, China, Japan, South Korea, Singapore, India, New Zealand, Pakistan, ug Vietnam ang gilauman nga magpadala sa ilang delegasyon sa maong international conference.
