Giangkon ni Tourism Sec. Christina Garcia Frasco nga anaa kini sa London, England sa Europe niadtong Martes sa buntag, Nobyembre 4 atol sa kataas sa pag-igo sa Bagyong Tino sa Sugbo.
Kini ang gipamahayag ni Garcia Frasco sa iyang social media page, nga miabot siya sa London, England sa Europe niadtong Martes isip pangu sa delegasyon sa Pilipinas sa World Travel Market.
Dugang niini, girepresentar niya ang nasud sa Ministerial Summit ug nangulo sa pag-abli sa Philippine stand niadtong adlawa.
Apan human sa pagkahibalo nila sa delubyong gibilin sa bagyo sa Sugbo kay miuli dayon kini sila pag Nobyembre 5 (oras sa England) ug miabot na diri sa Pilipinas pag-Nobyembre 6.
Ingon man nga nakighimamat dayon sa mga biktima sa bagyo sa Tiltilon, Barangay Cotcot, Liloan niadtong Huwebes sa gabii, Nobyembre 6 kauban ang iyang bana nga si Cebu 5th District Rep. Vincent Franco “Duke” Frasco ug ni Liloan Municipal Mayor Aljew Jordan Frasco.
Gilibot nila ang dapit nga naapektuhan ug nanghatag sa mga family food packs nga gikan sa DSWD ug giingong nitunol pa og kwartang hinabang gikan sa ilang kaugalingong bulsa.
