Gipaambit ni US President Donald Trump nga ang Estados Unidos ang modumala sa Venezuela hangtod nga mahitabo ang luwas nga transisyon human sa pagkadakop ni Presidente Nicolás Maduro ug sa iyang asawa.
Kini human usab sa pagmando ni Trump ang pag-atake sa mga military sites sulod sa Venezuela gahapon, Sabado, Enero 3.
Gikumpirmar sa mga opisyal sa US ang paglunsad sa mga pag-atake sa Amerika sa Venezuela.
Nadungog usab ang sunod-sunod nga mga pagbuto sa kapital sa Venezuela nga Caracas ug tungod sa pag-atake, daghang mga komunidad sa palibot ang walay kuryente.//
Niatubang usab si Trumo sa mga tigbalita, diin iyang gikumpirmar ang pagkasikop kang Maduro ug sa iyang asawa ug miingon nga giisip kini nga makasaysayanon ug usa sa mga gitawag nga ‘powerful’ force sa America.
Samtang, gipahibalo ni Trump nga si Venezuelan President Nicolas Maduro, kinsa giklasipikar sa US nga terorista, nadakpan na uban sa iyang asawa, nga si First Lady Cilia Flores.
Sa usa ka post sa Truth Social account, gikumpirmar sa US President nga malampuson ang mga dagkong welga nga gihimo sa Amerika batok sa Venezuela, nga giingong miresulta sa pagkadakop sa lider niini nga si Presidente Maduro, uban sa iyang asawa, ug sa iyang pag-ikyas gikan sa nasud.
Ang US President miingon nga ang operasyon gihimo uban sa kooperasyon sa US Law Enforcement.
Basi sa mga report, daghang mga opisyal ang nag-ingon nga si Maduro nadakpan sa kasundalohan sa US, ang Delta Force, ang nanguna nga unit sa kontra-terorismo sa militar sa US.
Sa wala pa ang pahibalo ni Trump, ang Estados Unidos nagtanyag og $50 milyon nga ganti alang sa impormasyon nga mosangpot sa pagkadakop ni Maduro.
Giktakda usab nga moatubang sa korte sa Amerika si Venezuelan President Nicolas Maduro human sa iyang pagkasikop, matud ni US Attorney General Pam Bondi.
Gitumbok ni Bondi nga ang akusasyon batok kang Maduro nga nag-akusar kaniya og “Narco-Terrorism Conspiracy, Cocaine Importation Conspiracy, Possession of Machineguns and Destructive Devices, and Conspiracy to Possess Machineguns and Destructive Devices against the United States.”
