CEBU CITY- Nipahigayon og buy-bust operation ang hiniusang elemento sa PDEA 7 ug Cebu City Police Office Station 10 sa Sitio Upper Greenbelt, Barangay Quiot, dakbayan sa Sugbo, hinungdan sa pagkabungkag sa usa ka drug den ug pagkasikop sa upat, mga alas 6:23 sa gabii, Hulyo 14, 2023.
Ang nasikop mao ang subject sa operation ug drug den maintainer nga giilang sila si Brian Sevellejo, 25, ug ang kauban niini nga si Raymond Garcia, 31, parehong way trabaho.
Nasikop usab ang duha ka mga bisita sa drug den nga giilang sila si Shamaica Nicole Alabat, 22, ug Reccis Pardo Jr., 27, parehong way trabaho.
Nasakmit atol sa operasyon ang walo pakite sa gituohang shabu nga motimbang og 15 gramos nga gibanabana nga mobalor sa P102,000, buy-bust money, ug nagkadaiyang drug paraphernalia.
Ang mga piraso sa ebidensya gisumite alang sa pagtuki sa kemikal.
Pasakaan ug kasong paglapas sa Section 5, 6, 7, 11, 12, ug 26, Article II sa RA 9165 batok sa mga suspek.
