Wala makapugong ang motion nga gipasaka sa kampo ni incumbent Cebu Governor Gwendolyn Garcia, gahapon atol sa adlaw sa proklamasyon sa bag-ong napili nga gobernadora sa Sugbo nga si Pamela Baricuatro.
Kini human manguna sa 2025 midterm election canvassing nga adunay halapad nga margin batok sa kasamtangan ug anaa sa iyang ika-lima nga termino nga gobernadora.
Taliwa sa mga kakuliyang sama sa kalit nga pag-us-os sa ihap sa mga boto ug sa temporaryong pagsuspendi sa canvassing operations, apan dili malalis ang dakong ligas niini kang Garcia sa iyang boto.
Hangtud nga nahibalik ang operasyon ug nakakuha si Baricuatro og 1,107,924 ka boto, kung itandi sa 765,051 ka boto nga nakuha ni Garcia, atol sa final tally pasado alas 3:00 sa hapon.
Nakab-ot ni Baricuatro ang kadaugan pinaagi sa 29-ka nga lokalidad samtang 22-ka lokalidad lamang ang nakuha ni Garcia, sulod sa 51-ka mga dakbayan ug munisipalidad sa Sugbo.
Sa pagpakighinabi Bombo News Team, nipadayag kini og pasalamat sa iyang mga dumadapig, ilabi na sa mga nakig-alayon ni kanhi Presidente Rodrigo Duterte.
Matud ni Baricuatro, nga sa iyang kadaugan pokusan niya ang pag-atiman sa panglawas sa mga katawhan sa Probinsiya sa Sugbo, apil na niini ang pagpahapsay sa nagkalain-laing programa, proyekto, ug serbisyo sa Kapitolyo.
Gihimug-atan usab niini nga iyang ipadayon ang mga programa sa administrasyon nga nakatabang ug nakabenipisyo sa mga Sugboanon apan iyang gipasalig nga iya kining tukion pag-ayo. | Bombo Nathaniel Sandoval
