SAN FERNANDO, CEBU-Dead on arrival ang usa ka senior citizen nga lalaki human kini malumos samtang namukot sa kadagatan sa Yellowhouse, habig sa Sitio Taboan, Brgy. San Isidro, Lungsod sa San Fernando kaganihang pasado alas 9 sa buntag, Dominggo Mayo 4, 2025.
Ang biktima kay giilang si Gregorio Pacquiao Natinga, 62 anyos, minyo, ug lumad nga taga Purok Acacia, Brgy. San Isidro, Lungsod sa San Fernando sa habagatang Sugbo.
Matud pa ni Police Corporal Helbert Lapitan, ang imbestigador sa San Fernando Police Station, nasayran nga ang biktima miuban sa iyang ig-agaw nga si Asterio Paradero nga mamukot sa Yellowhouse beach pasado alas 9 sa buntag.
Sa diha nga miadto sa lawom nga bahin sa dagat ang iyang ig-agaw nga si Paradero, misuway ug sunod ang biktima nga si Natinga bisan pa dili siya kahibalo molangoy. Ug pipila ka minuto niana, nangayo ug pakitabang ang biktima tungod kay nalumos na kini.
Daling gitabang ang biktima ug gidala sa Carcar City Provincial Hospital diin gideklarar kini nga dead on arrival.
Tungod sa insidente, nagpahimangno ang kapulisan sa Lungsod sa San Fernando sa publiko labi na katong mga dili kahibalo molangoy nga dili moadto sa mga lawom nga bahin sa kadagatan para dili na mausban ang mao nga panghitabo.
