PROVINCE OF BOHOL-Gikompirmar sa mga otoridad nga duha ka bata ang namatay human sa nahitabong sunog sa Brgy. Manga, Tagbilaran City Bohol niadtung Agosto 14, 2024.
Ang mga biktima mao ang tres anyos nga babaye ug usa ka tuig nga batang lalaki.
Samtang kritikal karon ang kahimtang ug padayon nga nagpaalim sa tambalanan ang 53-anyos nga amahan sa mga biktima nga giilang si Edgardo Lasco Sr.
Sa pakighinabi kang SF01 Irvin Bongalos sa Tagbilaran City Fire Station, siya niingon nga grabeng paso ang nahiaguman ni Edgardo sa tibuok lawas human niya gisulayan pagluwas ang iyang duha ka mga anak nga nangatulog dihang niulbo ang sunog.
Dugang ni Bongalos, nga nadawat nila ang alarma alas 8:15 sa gabii ug gideklarar kini nga fire out paglabay sa 30 minutos.
Matod niya, tulo ka mga balay ang naapektuhan sa sunog nga daling nikuyanap tungod kay ginama lamang kini sa light materials samtang gibana-bana nga mokabat sa P25,000 ang kantidad sa gibilin nga danyos.
Dili pa makaestorya karon ang amahan sa mga bata tungod sa grabeng kadaot sa iyang lawas.
Giingong padayon pa ang ilang imbestigasyon kalabot sa nasangpit nga insidente.
Sa laing bahin, ang kagamhanan sa dakbayan sa Tagbilaran nisaad nga abagan ang gasto sa pagpalubong sa duha ka mga biktima ug ang bayronon sa tambalanan ni Lasco Sr.
