Gihatagan dayon og arrival honors ug pasidungog sa Philippine Air Force ang duha ka piloto nga namatay nga sila si Major Jude Salang-Oy ug First Lt. April John Dadulla sa nahagsa nga FA-50 fighter jet sa dihang mitugpa kini sa C-130 aircraft sa Villamor Airbase.
Gipangunahan kini ni DND Secretary Gilberto Teodoro Jr., Special Assistant to the President Secretary Antonio Lagdameo Jr., AFP Chief of Staff General Romeo Brawner Jr., ug uban pang dagkong opisyal sa PAF.
Matud ni PAF spokesperson Col. Consuelo Castillo, ang award nga nadawat sa duha ka piloto kay mao ang Distinguish Aviation Cross, diin mao kini ang labing taas nga pasidungog nga gihatag sa usa ka miyembro sa PAF nga nakahimo og talagsaong serbisyo ug nagpakita og kaisog, dedikasyon, ug kahanas sa ilang katungdanan.
Dugang ni Col. Castillo nga wala pa matino kung kanus-a magpabilin ang mga patayng lawas sa mga piloto sa Pasay, apan plano nila nga ibalhin kini sa Basa Air Base sa Pampanga aron makauban ang ilang mga kaubang fighter pilot hangtod sa Martes sa gabii.
Samtang sa Miyerkules, ang mga patayng lawas sa mga piloto ipauli sa ilang tagsa-tagsa ka lungsod.
Nagdumili ang pamilya nga interbyuhon, ug sumala ni Col. Castillo, nihangyo usab ang pamilya nga respetuhon ang ilang privacy atol sa vigil nga ipahigayon sa Villamor Airbase.
Samtang, padayong giduso ni Senador Ronald “Bato” dela Rosa, kinsang personal nga mihatag og pasidungog sa duha ka opisyal sa Philippine Air Force, ang modernisasyon sa Armed Forces of the Philippines pinaagi sa paghatag kanila og igong pundo.
Ang AFP Modernization Program naglakip sa aviation-engineering equipment, dugang nga eroplano para sa militar, joint tactical combat vehicles, ug radar-basing support system.
