Gibutyag sa Commission on Elections (Comelec) ang 21 ka mga kontraktor nga giingong midonar sa mga kandidato alang sa ilang pagpangampanya niadtong May 2025 midterm elections.
Matod ni Comelec Chairman George Erwin Garcia, ang impormasyon gibase sa 42,000 ka Statements of Contributions and Expenditures (SOCEs) nga gi-review sa ilang legal department.
Iyang giklaro nga ang 21 ka mga kontraktor wala magpasabot nga 21 ka mga kandidato usab ang nalambigit niini. Matod niya nga walo ang ilang natala nga giingong nalambigit sa donasyon.
Dugang pa sa opisyal nga dili molapas sa duha ka semana ang ilang imbestigasyon ug mahuman na kini sa dili madugay samtang maghuwat sila sa kompirmasyon gikan sa Department of Public Works and Highways (DPWH).
Samtang gipasalig ni Garcia nga kon mahuman na ang imbestigasyon, mokontak dayon sila ug mopadala og suwat ngadto sa DPWH aron pagmatuod kon contractor ba gyud sa gobyerno ang mga ngalan nga mitumaw sa ilang imbestigasyon.
