PROVINCE OF CEBU-Nakadawat ang tulo ka lungsod sa isla sa Camotes nga mukabat ang balor sa P26.2-milyones isip hinabang pinansyal gikan sa kagamhanang probinsya sa Sugbo.
Gitugyan kini ni Cebu Provincial Governor Gwen Garcia ang mga tseke nga nagkantidad og P8-milyones matag usa ngadto kang Tudela Mayor Greman Solante, Poro Mayor Gary Rama, ug San Francisco Mayor Al Arquillano Jr. atol sa Caravan of Services sa Tudela Civic Center niadtong Hunyo 26, 2024.
Sa maong kantidad, P3-milyones ang gigahin alang sa calamity funds sa matag lungsod ug laing P3-milyones ang subsidy sa Kapitolyo alang sa partisipasyon sa matag lungsod sa Suroy-Suroy Sugbo Enchanting Camotes niadtong Mayo.
Dugang pa nga laing P2-milyones ang gigahin alang sa matag lungsod sa ilang mga proyekto sa imprastraktura.
Ang P3-milyones nga calamity fund gipagawas isip tubag sa grabeng epekto sa El Niño human ang Kapitolyo nideklarar og State of Calamity sa Sugbo pinaagi sa Executive Order No. 9, series of 2024.
Subay niini nga adunay 11 ka mga barangay nga gikan sa 3 barangay sa lungsod sa Tudela ug Poro ug 5 gikan sa San Francisco ang nakadawat og laing P200,000 gikan sa Kapitolyo alang sa ilang mga proyekto sa barangay.
Niadtong Hunyo 25, ang isla-lungsod sa Pilar, gitugyanan ni Gobernador Gwen ngadto kang Mayor Manuel Santiago ug sa 13 ka barangay kapitan ang hinabang pinansyal nga nagkantidad og P10.6 milyones gikan sa Kapitolyo.
